Баспасөз хабарламасы. 1 наурыз — «Нөлдік кемсітушілік» күні

1 наурызда бүкіл әлемде БҰҰ-ның АИТВ/ЖИТС жөніндегі Біріккен бағдарламасының (UNAIDS) бастамасымен «Нөлдік кемсітушілік» күні өткізіледі. Бұл күн әрбір адамның қадір-қасиет пен теңдік жағдайында толыққанды әрі өнімді өмір сүруге құқығы бар екенін көрсетеді. Сондай-ақ адам құқықтарын қорғаудың, медициналық көмектің тең қолжетімділігін қамтамасыз етудің және стигма мен кемсітушіліктің кез келген түріне жол бермеудің маңыздылығын еске салады, оның ішінде АИТВ-мен өмір сүретін адамдарға қатысты да.

АИТВ-жұқпасының алдын алу мен емдеу саласында қол жеткізілген жетістіктерге қарамастан, кемсітушілік әлі де уақтылы тестілеуден өтуге, емдеуді бастауға және терапияға бейімділікті қалыптастыруға кедергі келтіретін негізгі факторлардың бірі болып отыр. Қоғам тарапынан болатын айыптау мен алдын ала қалыптасқан теріс көзқарастар медициналық көмекке кеш жүгінуге және пациенттердің өмір сапасының төмендеуіне әкелуі мүмкін.

2026 жылғы тақырып — «Адамдар бәрінен бұрын» — стигма мен кемсітушілік тәжірибелерінің өмірлік маңызы бар қызметтерге қолжетімділікті шектеп, адам құқықтарын бұзатынын айқындайды. UNAIDS денсаулық сақтау жүйесін қоса алғанда, қауіпсіз, инклюзивті және кемсітушіліксіз орта қалыптастыруға шақырады.

Абай облысы Денсаулық сақтау басқармасының АИТВ-инфекциясының алдын алу жөніндегі облыстық орталығы стигма мен кемсітушілікті төмендетуге бағытталған шараларды жүйелі түрде жүзеге асырып келеді:

• халық арасында АИТВ-жұқпасының алдын алу және кемсітушілікке жол бермеу мәселелері бойынша ақпараттық-түсіндіру жұмыстары жүргізіледі;
• медициналық қызметкерлерге арналған оқыту іс-шаралары ұйымдастырылады;
• толерантты көзқарасты қалыптастыруға және халықтың ақпараттану деңгейін арттыруға бағытталған профилактикалық бағдарламалар іске асырылады;
• барлық пациенттерге медициналық көмек көрсету кезінде құпиялылық пен тең қарым-қатынас қамтамасыз етіледі.

Орталық денсаулық сақтау ұйымдарын, қоғамдық ұйымдарды, жұмыс берушілерді және Абай облысының әрбір тұрғынын:

• кемсітушілікке белсенді түрде қарсы тұруға;
• АИТВ-жұқпасы туралы шынайы әрі дәл ақпарат таратуға;
• әрбір адам медициналық көмекті айыптаусыз және кедергілерсіз ала алатын инклюзивті орта қалыптастыруға үлес қосуға шақырады.

Абай облысы Денсаулық сақтау басқармасының АИТВ-инфекциясының алдын алу жөніндегі облыстық орталығы АИТВ — уақтылы және үздіксіз ем қабылдаған жағдайда адамға толыққанды әрі белсенді өмір сүруге мүмкіндік беретін созылмалы ауру екенін атап өтеді.
Стигма, мифтер мен теріс көзқарастар медициналық көмекке қолжетімділікті шектемеуі тиіс.

«Нөлдік кемсітушілік» күні — адам құқықтарын құрметтеу, сенімді ақпаратқа қолжетімділік пен қолдау АИТВ-жұқпасының тиімді алдын алудың негізі екенін тағы бір мәрте еске салатын күн.