Абай облысында АИТВ-жұқпасы мәселелері бойынша облыстық семинар өтті

22 сәуір күні Абай облысында №1 емхана базасында медициналық ұйым өкілдеріне арналған АИТВ-жұқпасы мәселелері бойынша облыстық семинар өтті. Іс-шараны Абай облысының Денсаулық сақтау басқармасы мен Абай облыстық АИТВ инфекциясының алдын алу орталығы ұйымдастырды.

Семинар барысында орталық мамандары АИТВ-жұқпасының алдын алу, Қазақстан Республикасындағы, Абай облысы мен Семей қаласындағы эпидемиологиялық ахуал, сондай-ақ қолданыстағы нормативтік-құқықтық актілерге енгізілген өзгерістер туралы жан-жақты ақпарат берді.

Орталық директоры Әділжанов А.Б. атап өткендей, бастапқы медициналық-санитариялық көмек деңгейінде АИТВ-жұқпасын ерте анықтау — емдеуді уақтылы бастауға, пациенттің өмір сапасын сақтауға, сондай-ақ диагностика және емдеумен қамтуды арттыруға, АИТВ берілуін төмендетуге бағытталған 95-95-95 мақсаттарына қол жеткізудің маңызды тетігі.

Семинар аясында скрининг сапасы, халықты клиникалық көрсеткіштер бойынша тексеру, байланыстан кейінгі профилактика, зертханалық зерттеулер сапасын қамтамасыз ету, сондай-ақ АИТВ-мен өмір сүретін адамдарға қатысты стигма мен кемсітушілік мәселелері кеңінен талқыланды.

Мұндай іс-шаралар медицина қызметкерлерінің кәсіби білімі мен хабардарлығын арттыруға, медициналық ұйымдар арасындағы өзара іс-қимылды нығайтуға және облыста АИТВ-жұқпасының алдын алу бағытындағы жұмысты жетілдіруге мүмкіндік береді.